သဘာဝအတိုင်း ကောင်းကောင်းအိပ်ပျော်နိုင်အောင် ဘာတွေလုပ်ပေးသင့်လဲ
ခေါင်းအုံးနဲ့ထိလိုက်တာနဲ့ ဘဝကြီးကို မေ့ပြီး တန်းကနဲ အိပ်ပျော်သွားတတ်သူတွေအတွက်တော့ ဒီကိစ္စက ပြောပလောက်တာမဟုတ်ပေမဲ့ ညဘက်တွေမှာ မှေးကနဲ အိပ်ပျော်ဖို့ကိုတောင် အနိုင်နိုင်ခက်ခဲနေတတ်သူတွေအတွက်တော့ အခုပြောမယ့် အချက်တွေကို သေချာလုပ်ကြည့်စေချင်ပါတယ်။
ပုံမှန်အားဖြင့် အိပ်စက်မှုပုံစံဆိုတာ နေ့စဉ်အသားကျအောင် လုပ်သွားရတဲ့ အချိန်ဇယားတစ်ခုဖြစ်ပြီး ကိုယ့်ရဲ့တစ်နေ့တာ နေထိုင်မှုပုံစံတွေကို ပြင်ဆင်မယ်ဆိုရင်တော့ ညဘက်တွေမှာ သေချာအိပ်မောကျအောင် အိပ်စက်အနားယူနိုင်ဖို့ အရမ်းမခက်ခဲပါဘူး။
ဒါဆို ဘယ်လိုပြင်ဆင်ရမလဲ?
၁။ အိပ်ချိန်ဇယားတစ်ခု သေချာဆွဲထားပါ။
အပေါ်မှာ ပြောခဲ့သလိုပဲ၊ ကိုယ့်တစ်နေ့တာမှာ ဘယ်အချိန်မှာ အိပ်ပြီး၊ ဘယ်အချိန်မှာ ထမလဲဆိုတာကို နေ့စဉ်နေ့တိုင်း ပုံမှန်လုပ်ပေးသွားမယ်ဆိုရင် အိပ်ဖို့အချိန်ရောက်ပြီဆိုတာနဲ့ ဦးနှောက်ကနေ အိပ်ရတော့မယ်ဆိုတဲ့ အသိကို လှုံ့ဆော်ပေးမှာဖြစ်ပြီး ကောင်းကောင်းအိပ်စက်နိုင်အောင်လည်း ကူညီပေးမှာပါ။
၂။ ဆူညံသံ ကင်းစင်နေပါစေ။
အိပ်ခန်းဆိုတာ ဆူညံသံကင်းကင်းနဲ့ မှေးစက်အနားယူရတဲ့ အခန်းဖြစ်တာကြောင့် ကိုယ့်အခန်းထဲမှာ မလိုအပ်တဲ့ ဆူညံသံတွေကို မရှိနေသင့်ပါဘူး။ အကယ်လို့ ကိုယ့်အိမ်မှာ မလိုအပ်ဘဲ တရားခွေ၊ ရုပ်ရှင် အကျယ်ကြီးဖွင့်ထားတတ်သူတွေရှိရင် အသံတိုးဖို့ သတိပေးပါ၊ ကလေးတွေရှိရင် သူတို့ကိုလည်း အချိန်မှန်အိပ်တတ်အောင် လေ့ကျင့်ပေးပါ။
၃။ အစာစားချိန်ကို ဂရုစိုက်ပါ။
နောက်ဆုံး ညစာစားချိန်ဟာ အိပ်ချိန်နဲ့ အနည်းဆုံး ၃ နာရီလောက်ခြားပြီး ည ၈ နာရီထက် နောက်ကျပြီး ထမင်းစားတာမျိုး မလုပ်သင့်ပါဘူး။ အထူးသဖြင့် အိပ်ကာနီးမှ အစာစားတာ၊ ညမအိပ်ဘဲ အစာစားခြင်းဟာ ကိုယ်တွင်းအင်္ဂါတွေရဲ့ လုပ်ဆောင်မှုကို ကမောက်ကမဖြစ်စေသလို၊ ကိုယ်အလေးချိန်နဲ့ ကျန်းမာရေးကိုလည်း ထိခိုက်စေနိုင်တာကြောင့် သတိပြုသင့်ပါတယ်။
၄။ အီလက်ထရောနစ်ပစ္စည်းတွေကို အထိန်းအကွပ်နဲ့ အသုံးပြုပါ။
ကိုယ်က အလုပ်ကြောင့်၊ ပညာရေးကြောင့် ဖုန်း၊ ကွန်ပျူတာကို မဖြစ်မနေအသုံးပြုရတာမျိုးကလွဲရင် တစ်နေ့တာမှာ ဖုန်းသုံးချိန်တွေကို တတ်နိုင်သလောက် နည်းအောင်လျှော့ပေးပါ။ အိပ်ချိန်နဲ့ အနည်းဆုံးတစ်နာရီလောက်ခြားပြီး နောက်ဆုံးထားလို့ ဖုန်းအသုံးပြုပြီး ကိုယ်လက်လှမ်းမမီတဲ့နေရာမှာ အီလက်ထရောနစ်ပစ္စည်းတွေကို ထားခဲ့လို့ အိပ်ခန်းထဲကို ဒီအတိုင်းပဲ ဝင်အိပ်ပေးပါ။
၅။ လေ့ကျင့်ခန်းလုပ်ပေးပါ။
လေ့ကျင့်ခန်းလုပ်ခြင်းဟာ ကျန်းမာရေးအတွက် ကောင်းတဲ့အပြင် ကြွက်သားတွေကို အလွန်အကျွံအသုံးပြုပြီး အားအင်ကုန်ခမ်းစေတာကြောင့် လေ့ကျင့်ခန်းပုံမှန်လုပ်သူတွေဟာ ညဘက်တွေမှာ စောစောအနားယူချင်စိတ်ကို ဖြစ်စေပါတယ်။ အကယ်လို့ Gym သွားပြီး လေ့ကျင့်ခန်းမလုပ်နိုင်ဘူးဆိုရင်တောင် ကိုယ့်အိမ်ထဲမှာ ယောဂကျင့်တာ၊ တရားထိုင်တာ၊ ကိုယ်ကာယလေ့ကျင့်ခန်း လုပ်တာ၊ ဒိုက်ထိုးတာ၊ အိပ်ထမတင် လေ့ကျင့်ခန်းမျိုးတွေကို အလွယ်တကူ လုပ်ပေးနိုင်ပါတယ်။
၆။ ရေပူရေနွေးနဲ့ ရေချိုး၊ ရေစိမ်ပေးပါ။
ရေနွေးနဲ့ ရေချိုးပေးခြင်းက ခန္ဓာကိုယ်က ကြွက်သားတွေကို ပျော့ပျောင်းစေပြီး ဦးနှောက်အာရုံကြောစနစ်ကို သက်သောင့်သက်သာဖြစ်စေတယ်။ အပူငွေ့ဟာ စိတ်ကို Relax ဖြစ်စေပြီး စိတ်ဖိစီးမှုကို လျော့ကျစေတာကြောင့် ညအိပ်ကာနီး ရေနွေးနဲ့ ရေချိုးရေစိမ်ပေးနိုင်ရင် ကောင်းကောင်းအိပ်ပျော်စေဖို့ ကူညီပေးနိုင်မှာပါ။ ရေပူနဲ့စိမ်တာ အာနိသင်ပိုရှိတယ်ဆိုပေမဲ့ ကျန်းမာရေးအတွက် ကောင်းကျိုး၊ ဆိုးကျိုးဒွန်တွဲနေတာကြောင့် တစ်ခါတလေမှပဲ ရေပူချိုးပေးသင့်ပါတယ်။
၇။ နေ့လယ်ဘက် တစ်ရေးအိပ်တာကို ရှောင်ပါ။
ဒါနဲ့ ပတ်သက်ရင်တော့ များများစားစား ပြောဖို့လိုမယ်မထင်ပါဘူး။ နေ့လယ်ဘက် တစ်ရေးအိပ်တာကို တစ်နေ့တာညအိပ်ချိန်မှာ ထည့်မတွက်တဲ့အတွက် တတ်နိုင်ရင် ညဘက်မှပဲ စောစောအိပ်ပေးသင့်ပါတယ်။
၈။ ကဖင်းဓာတ်သောက်သုံးမှုကို လျှော့ချပါ။
ကိုယ်က ကဖင်းဓာတ်ကို ပုံမှန်သောက်တတ်သူဆိုရင် တစ်နေ့ကော်ဖီတစ်ခွက်လောက် သောက်တာ ပြဿနာမရှိပေမဲ့ အဲဒီပမာဏထက် ပိုရင်တော့ ညဘက်မှာ အိပ်မပျော်ဘဲ ဖြစ်နိုင်ပါတယ်။ ချွင်းချက်အနေနဲ့ ကဖင်းဓာတ်ပါမှ ညအိပ်ပျော်တဲ့သူတွေကတော့ ပုံမှန်သောက်နေကျအတိုင်းပဲ သောက်လို့ရပါတယ်။
ညအိပ်ချိန်ဟာ အစားထိုးပြန်မရတဲ့အတွက် ကိုယ့်ကျန်းမာရေးအတွက် ရေရှည်မှာ ဆိုးကျိုးမဖြစ်စေဖို့ ညအိပ်ချိန်ကို ပုံမှန်လေး သေချာဂရုစိုက်ပေးနိုင်ရင်တော့ အကောင်းဆုံးပါပဲ။
ရဲမျိုးမြတ်